2012 fibberw IV(laat u voorlezen!)
Nog ee moal loeë de klokke in d'r kirchtoer. Vuur de letste moal ing maes. Da jeet vuur ummer de kirch tsouw. 't Is ing faierlieje maes. Mit drei jeeslieje, tsieg maesdenere en e paar koere, sjiek sjwats wies jekleid. Ze zinge oes volle brós. D'r pastoer hat 't in de preëdieg uvver de anger kirch woa noa hu de maese zunt. De lu in de kirch loestere. 't Zunt vuural lu van de anger kirch.
Noa de maes junt ze in protsessiejoeën noa de anger kirch. De harmonie jeet vuuróp. Sjpilt inne fesmarsj. 't Piepe van de kirchduur is nit tse hure. Ze vilt in 't sjlaos. Va binne weëd inne sjlussel umjedrieënd. De klokke sjwieje.
Hinger de vinstere kieke lu eroes. E paar daag jeleie trók d'r óptsóg langs. E lint va sjpas. Noen ing troeërsjlaif. In de zief ligke jet serpentines. Ing erinneróng an sjun daag. De tuen van de harmonie sjterve voet. In de sjtruuch bij de kirch likt ing roeë ballong. Leuft leëg. Jiddere daag jet mieë.
